Urchig u gmüetlech am Aarelouf… das isch s’Motto gsi vom diesjährige kant. Jodlerfescht z’Wange a dr Aare.
Vou u ganz het das Motto däm Fescht vom 15.-17. Juni 2018 entsproche.
Es het zwar das Johr nid eso viu Ahmäudige gha wie angeri Johr, derfür isch das Ganze schön übersichtlech blybe
S’ Ysinge hei mir dusse ar Aare bi warme Tämperature chönne gniesse u de si mir vou Spannig is Salzhuus, üsem Vortragslokal. Nachdäm de am Samschtinomi am füfi s’Glöggli ertönt isch, hei mir üses Lied «Bärgblueme» vom Emil Herzog zum Beschte gäh. Ufen Dorfplatz bir Linge, hei mir de uf üses Lied wo mir es «guet» usegsunge hei, ahgstosse u dä Obe gmüetlech u mit viu Gselligkeit loh usklinge.
Die wunderschöni Umgäbig, das mit Liebi zwäggmachte Jodlerdorf u die ganzi Atmosphäre het derzue bytreit, dass mir Jodler u Jodlerinne es unvergässlechs Fescht hei dörfe erläbe. DANKE Stefan für's Ystudiere vor Bärgblueme mit üs- mir si sehr froh um di!